Jæja kæru söngsystur.

Óskaplega hefur verið dauft yfir þessari síðu undanfarið en það horfir nú allt til betri vegar.

Kökubasarinn sl. miðvikudag gekk vonum framar og við getum verið mjög sáttar við afrakstur þess dags (þótt við náum ekki endilega þangað sem krakkagrislingarnir hennar Nínu hafa hælana!). Þrátt fyrir smávegis páskaliljusamkeppni á svæðinu kláruðust allar tertur upp úr kl. 17:00 og þá var lítið annað að gera í stöðunni en að pakka saman og fara. Við hefðum eflaust getað verið með helmingi fleiri tertur

Framundan er æfingadagur laugardaginn 5. apríl. Búið er að bóka sal og við mætum þangað hýrar á brún og brá með nótur, kræsingar og hverjar þær guðaveigar sem hugur okkar girnist. Hver veit nema Pauline mæti með Karaoke-græjurnar frægu, þannig að þær sem gerðu garðinn frægan á kerlingakvöldinu í fyrra geti rifjað upp taktana sem seint munu líða okkur hinum úr minni. (Ertu ekki komin með neitt með Sálinni Pauline??)

Svo er best að geta þess tímanlega að í lok apríl verður kórinn með bás á Markaðsdeginum á Safnasvæðinu. Þar verður flóamarkaðsstemning til fjáröflunar. Heyrst hefur að sumar kórkonur séu þegar komnar hálfar inn í geymslu hjá sér og reyta þaðan út gamla kjóla, matarstell og skópör í gríð og erg. Við hinar ættum að taka þær okkur til fyrirmyndar .

Gleðilega páska allar saman og sjáumst heilar, súkkulaðiþrútnar og tímanlega á þriðjudaginn

Loksins, loksins!

Vetrarstarfið hjá kvennakórnum Ymi er hafið.

Við höfum beðið í allt sumar eftir því að fá að hefja upp raust okkar á ný. Ekki skemmir fyrir hversu veturinn framundan verður gríðarlega spennandi og margt nýtt á döfinni:

---

• Við ætlum að fara til Hollands í vor!
• Æfingar hafa verið fluttar í nýja glæsilega tónlistarskólann við Dalbraut
• Við ætlum að fara til Hollands í vor!
• Framundan er skemmtileg vinna við ýmsar fjáraflanir tengdum ferðinni:
• kaffihúsakvöld
• spákonukvöld
• tónleikahald
• jólastemning í desember
• og margt, margt fleira
• ...var ekki örugglega búið að minnast á Holland??

---

Nokkrar nýjar söngkonur hafa bæst í hópinn síðan í vor en við getum ennþá bætt við okkur í allar raddir.
Ef þú hefur áhuga á að syngja með hressum konum og taka þátt í skemmtilegu kórstarfi, endilega hafðu þá samband við okkur... nú, eða láttu bara sjá þig á Dalbrautinni.

Æfingar eru eins og venjulega á þriðjudagskvöldum kl. 20:00